Прокимен, глас 4: Творя́й а́нгелы Своя́ ду́хи, / и слуги́ Своя́ пла́мень о́гненный.

Стих: Благослови́, душе́ моя́, Го́спода, Го́споди Бо́же мой, возвели́чился еси́ зело́.

Аллилуиа, глас 5: Хвали́те Го́спода, вси а́нгели Его́, хвали́те Его́, вся си́лы Его́.

Стих: Я́ко Той рече́ и бы́ша, Той повеле́ и созда́шася.

Прокимен, глас 7: Возвесели́тся пра́ведник о Го́споде / и упова́ет на Него́.

Стих: Услы́ши, Бо́же, глас мой, внегда́ моли́ти ми ся к Тебе́.

Аллилуиа, глас 4: Пра́ведник я́ко фи́никс процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т.

Прокимен, глас 3, песнь Богородицы: Вели́чит душа́ Моя́ Го́спода, / и возра́довася дух Мой о Бо́зе Спа́се Мое́м.

Стих: Я́ко призре́ на смире́ние рабы́ Своея́, се бо отны́не ублажа́т Мя вси ро́ди.

Аллилуиа, глас 8: Слы́ши, Дщи, и виждь, и приклони́ у́хо Твое́.

Стих: Лицу́ Твоему́ помо́лятся бога́тии лю́дстии.

Прокимен, глас 8: Во всю зе́млю изы́де веща́ние их, / и в концы́ вселе́нныя глаго́лы их.

Стих: Небеса́ пове́дают сла́ву Бо́жию, творе́ние же руку́ Его́ возвеща́ет твердь.

Аллилуиа, глас 1: Испове́дят небеса́ чудеса́ Твоя́, Го́споди, и́бо и́стину Твою́ в Це́ркви святы́х.

Стих: Бог прославля́ем в сове́те святы́х.

Прокимен, глас 7: Возноси́те Го́спода Бо́га на́шего, и покланя́йтеся подно́жию но́гу Его́, / я́ко свя́то есть.

Стих: Госпо́дь воцари́ся, да гне́ваются лю́дие.

Аллилуиа, глас 1: Помяни́ сонм Твой, его́же стяжа́л еси́ испе́рва.

Стих: Бог же Царь наш пре́жде ве́ка, соде́ла спасе́ние посреде́ земли́.

Прокимен, глас 8: Весели́теся о Го́споде, / и ра́дуйтеся, пра́веднии.

Стих: Блаже́ни, и́хже оста́вишася беззако́ния и и́хже прикры́шася греси́.

Прокимен, глас 6: Ду́ши их / во благи́х водворя́тся.

Аллилуиа, глас 4: Воззва́ша пра́веднии, и Госпо́дь услы́ша их, и от всех скорбе́й их изба́ви их.

Стих: Мно́ги ско́рби пра́ведным, и от всех их изба́вит я́ Госпо́дь.

Стих: Блаже́ни, я́же избра́л и прия́л еси́, Го́споди, и па́мять их в род и род.