Последование Святыя Четыредесятницы, субботам и неделям святаго великаго поста

Суббота 1 поста

Прокимен, глас 7: Возвесели́тся пра́ведник о Го́споде, / и упова́ет на Него́.

Стих: Услы́ши, Бо́же, глас мой, внегда́ моли́ти ми ся к Тебе́.

Апостол к евреем, зачало 303, и святому, к Тимофею, зачало 292.

Аллилуиа. глас 4: Пра́ведник я́ко фи́никс процвете́т, я́ко кедр, и́же в Лива́не, умно́жится. Стих: Насажде́ни в дому́ Госпо́дни, во дво́рех Бо́га на́шего процвету́т.

Неделя 1 поста

Прокимен, глас 4. Песнь отцев: Благослове́н еси́, Го́споди Бо́же оте́ц на́ших, / и хва́льно и просла́влено и́мя Твое́ во ве́ки.

Стих: Я́ко пра́веден еси́ о всех, я́же сотвори́л еси́ нам.

Апостол к евреем, зачало 329, от полу.

Аллилуиа, глас 4: Моисе́й и Ааро́н во иере́ех Его́, и Саму́ил в призыва́ющих и́мя Его́.

Стих: Призыва́ху Го́спода, и Той послу́шаше их.

На молебном пении

Прокимен, глас 4: Насажде́ни в дому́ Госпо́дни, / во дво́рех Бо́га на́шего процвету́т.

Стих: Ра́дуйтеся пра́веднии о Го́споде, пра́вым подоба́ет похвала́.

Апостол к римляном, зачало 121.

Суббота 2 поста

Прокимен и аллилуиа дне, и за упокой.

Апостол к евреем, зачало 309. За упокой, зачало 270.

Неделя 2 поста

Прокимен, глас 5: Ты, Го́споди, сохрани́ши ны, и соблюде́ши ны / от ро́да сего́ и во век. Стих: Спаси́ мя, Го́споди, я́ко оскуде́ преподо́бный.

И святаго, прокимен, глас 1: Уста́ моя́ возглаго́лют прему́дрость, и поуче́ние се́рдца моего́ ра́зум.

Апостол к евреем, зачало 304. И святаго, зачало 318.

Аллилуиа гласа.

Суббота 3 поста

Прокимен дне, и за упокой.

Апостол к евреем, зачало 325: и за упокой, зачало 270.

Неделя 3 поста

Прокимен, глас 6: Спаси́, Го́споди, лю́ди Твоя́, / и благослови́ достоя́ние Твое́.

Стих: К Тебе́, Го́споди, воззову́, Бо́же мой, да не премолчи́ши от Мене́.

Апостол к евреем, зачало 311.

Аллилуиа, глас 8: Помяни́ сонм Твой, его́же стяжа́л еси́ испе́рва.

Стих: Бог же Царь наш пре́жде ве́ка, соде́ла спасе́ние посреде́ земли́.

Суббота 4 поста

Прокимен дне, и за упокой.

Апостол к евреем, зачало 313, и за упокой, зачало 163.

Неделя 4 поста

Прокимен гласа, и преподобнаго, глас 7: Восхва́лятся преподо́бнии во сла́ве, и возра́дуются на ло́жах свои́х.

Апостол к евреем, зачало 314, и святаго, зачало 229.

Аллилуиа гласа, и святаго.

Стих: Насажде́ни в дому́ Госпо́дни, во дво́рех Бо́га на́шего процвету́т.



Суббота 5 поста

Прокимен, глас 3, песнь Богородицы: Вели́чит душа́ Моя́ Го́спода, / и возра́довася дух Мой о Бо́зе, Спа́се Мое́м.

Стих: Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.

Апостол к евреем, зачало 322. И Богородице, зачало 320.

Аллилуиа, глас 8: Воскресни́, Го́споди, в поко́й Твой, Ты и киво́т святы́ни Твоея́.

Стих: Помяни́, Го́споди, Дави́да, и всю кро́тость его́.

Неделя 5 поста

Прокимен гласа, и преподобныя, глас 4: Ди́вен Бог во святы́х Свои́х, Бог Изра́илев.

Апостол к евреем, зачало 321, от полу, и преподобныя, зачало 208.

Аллилуиа гласа.

Суббота 6, Лазарева

Прокимен, глас 3: Госпо́дь просвеще́ние мое́, и Спаси́тель мой, / кого́ убою́ся?

Стих: Госпо́дь защи́титель живота́ моего́, от кого́ устрашу́ся?

Апостол к евреем, зачало 333, от полу.

Аллилуиа, глас 5: Госпо́дь воцари́ся, в ле́поту облече́ся.

Стих: И́бо утверди́ вселе́нную, я́же не подви́жится.

В неделю цветоносную

Прокимен, глас 4: Благослове́н Гряды́й во и́мя Госпо́дне, / Бог Госпо́дь и яви́ся нам.

Стих: Испове́дайтеся Го́сподеви, я́ко благ, я́ко в век ми́лость Его́.

Апостол к филипписием, зачало 247.

Аллилуиа, глас 1: Воспо́йте Го́сподеви песнь но́ву, я́ко ди́вна сотвори́ Госпо́дь.

Стих: Ви́деша вси концы́ земли́ спасе́ние Бо́га на́шего.

Во святый и великий четверток на литургии

Прокимен, глас 7: Кня́зи людсти́и собра́шася вку́пе, / на Го́спода и на Христа́ Его́.

Стих: Вску́ю шата́шася язы́цы, и лю́дие поучи́шася тще́тным?

Апостол к коринфяном, зачало 149.

Аллилуиа, глас 6: Блаже́н разумева́яй на ни́ща и убо́га, в день лют изба́вит его́ Госпо́дь. Стих: Врази́ мои́ ре́ша мне зла́я: когда́ у́мрет, и поги́бнет и́мя его́?

Стих: Яды́й хле́бы моя́, возвели́чи на мя запина́ние.

Во святый великий пяток вечера

Прокимен, глас 6: Положи́ша мя в ро́ве преиспо́днем, / в те́мных и се́ни сме́ртней.

Стих: Го́споди Бо́же спасе́ния моего́, во дни воззва́х, и в нощи́ пред Тобо́ю.

Апостол к коринфяном, зачало 125.

Аллилуиа, глас 5: Спаси́ мя, Бо́же, я́ко внидо́ша во́ды до души́ моея́.

Стих: Поноше́ние ча́яше душа́ моя́, и страсть.

Стих: Да помрача́тся о́чи их, е́же не ви́дети.

Во святую и великую субботу. На утрени, по великом славословии

Прокимен, глас 7: Воскресни́, Го́споди Бо́же мой, да вознесе́тся рука́ Твоя́, / не забу́ди убо́гих Твои́х до конца́.

Стих: Испове́мся Тебе́, Го́споди, всем се́рдцем мои́м, пове́м вся чудеса́ Твоя́.

Апостол к коринфяном, зачало 133, конец в 206-м зачале.

Аллилуиа, глас 5: Да воскре́снет Бог, и расточа́тся врази́ Его́, и да бежа́т от ли́ца Его́ ненави́дящии Его́.

Стих: Я́ко исчеза́ет дым, да исче́знут, я́ко та́ет воск от ли́ца огня́.

Стих: Та́ко да поги́бнут гре́шницы от ли́ца Бо́жия, а пра́ведницы да возвеселя́тся.

На литургии

Прокимен, глас 5: Вся земля́ да покло́нится Тебе́, и пое́т Тебе́, / да пое́т же и́мени Твоему́, Вы́шний.

Стих: Воскли́кните Го́сподеви вся земля́, по́йте же и́мени Его́.

Апостол к римляном, зачало 91.

Аллилуиа не поется, но по еже рещи иерею: Мир ти.

И абие чтец глаголет: Воскресни́, Бо́же, суди́ земли́, я́ко Ты насле́диши во всех язы́цех.

И лик тожде на глас 7. Чтец же глаголет стихи сия: Бог ста в со́нме бого́в, посреде́ же бо́ги разсу́дит. И певцы: Воскресни́, Бо́же:

Стих: Доко́ле су́дите непра́вду, и ли́ца гре́шников прие́млете? И певцы: Воскресни́, Бо́же:

Стих: Суди́те си́ру и убо́гу, смире́на и ни́ща оправда́йте. И певцы: Воскресни́, Бо́же:

Стих: Изми́те ни́ща и убо́га, из руки́ гре́шничи изба́вите его́. И певцы: Воскресни́, Бо́же:

Стих: Не позна́ша, ниже́ уразуме́ша, во тме хо́дят. И певцы: Воскресни́, Бо́же:

Стих: Да подви́жатся вся основа́ния земли́. Аз рех: бо́зи есте́, и сы́нове Вы́шняго вси, вы же я́ко челове́цы умира́ете, и я́ко еди́н от князе́й па́даете. И певцы: Воскресни́, Бо́же:

И абие чтец: Воскресни́, Бо́же, суди́ земли́.

И лик: Я́ко Ты насле́диши во всех язы́цех.